Ministri i Bujqësisë Edmond Panariti ishte sot i pranishëm në Shkodër ku ka zhvilluar takime me fermerë fillimisht në Drejtorinë e Bujqësisë në këtë qytet dhe më pas edhe në një fermë që ndodhet në zonën e Nënshkodrës. Ai është njohur me problemet e fermerëve ndërkohë është prononcuar edhe përsa i përket përmbytjeve. Sipas tij java e ardhshme parashikohet të ketë shira të rrëmbyer. “Më lejoni të theksoj që rreziku për përmbytje në këtë zonë është veçanërisht i lartë, veçanërisht po të nisemi nga fakti që ndryshimet klimatike dhe thatësirat e tejzgjatura, pa dyshim do kërkohet që të kemi një kompensim të këtij bilanci hidrik të munguar në javët që do të vijnë, dhe kjo do të vijë natyrisht jo me uniformitet të reshjeve, por pritet të kemi reshje të rrëmbyeshme që mund të kapërcejnë edhe 100 milimetra shi për 24 orë. Gjithë sistemi i hidrovoreve, i kanaleve kulluese përgjithësisht është projektuar dhe ndërtuar për të përballuar shira që nuk i kapërcejnë 40 milimetra shi për 24 orë. Ju duhet të dini që ne ndodhemi në situate të jashtëzakonshme.”- u shpreh Panariti.