Në datën 9 tetor nisin regjistrimet në ciklin e dytë të studimeve, pranë Universitetit të Mjekësisë. Procesi i regjistrimeve do të jetë i hapur deri në datën 27 tetor. Lidhur me këtë fakt, gazeta “Republika” publikon procedurat dhe kriteret që duhet të plotësojnë kandidatët për të ndjekur programet “Master Profesional” dhe “Master Shkencor”, kuotat dhe tarifat për të gjitha programet e studimit që ofron Universiteti i Mjekësisë. Në vijim të procedurave të pranimit dhe regjistrimit në vitin e ri akademik 2013-2014 për ciklin e dytë të studimeve me kohë të plotë, “Master Profesional” dhe “Master i Shkencave”, bazuar në Vendimin nr. 744, datë 05.09.2013, të Këshillit të Ministrave “Për kuotat e pranimit dhe tarifat e shkollimit në institucionet publike të Arsimit të Lartë, për ciklin e dytë të studimeve, me kohë të plotë, “Master Profesional” dhe “Master i Shkencave/Master i Arteve të Bukura”, për vitin akademik 2013- 2014″, dhe në mbështetje të Udhëzimit Nr. 49, datë 06.09.2013, të Ministrisë së Arsimit dhe Sporteve “Për procedurat e pranimit dhe të regjistrimit në ciklin e dytë të studimeve me kohë të plotë, “Master Profesional” dhe “Master Shkencor/Master i Arteve të Bukura” në institucionet Publike të Arsimit të Lartë, në vitin akademik 2013-2014”, Universiteti i Mjekësisë, Tiranë informon studentët mbi procedurat e pranimit dhe të regjistrimit në Fakultetin e Shëndetit Publik dhe në Fakultetin e Shkencave Mjekësore Teknike:

Kur nisin aplikimet

Aplikimet për regjistrim në programet e studimit të ciklit të dytë, “Master Profesional” dhe “Master i Shkencave” bëhen pranë sekretarive mësimore të dy Fakulteteve të Universitetit të Mjekësisë, Tiranë duke nisur nga data 09.09.2013 deri në datë 27.09.2013, nga ora 08:00 deri në orën 16:00, ku kandidati duhet të paraqitet personalisht dhe të dorëzojë dokumentacionin e mëposhtëm:

Dokumentacionet që duhen për regjistrim

a) Fotokopje të noterizuar të diplomës së ciklit të parë të studimeve të shoqëruar me listën origjinale të notave;
b) Dokument identifikimi (kartë identiteti ose pasaportë) dhe fotokopje të tyre. Në dosje do të mbahet fotokopja e kartës së identitetit ose e pasaportës.
c) 2 fotografi;
d) Mandat arkëtimi i tarifës së regjistrimit 2.500 lekë, paguar në Postën Shqiptare;
e) Deklaratë e kandidatit që vërteton se nuk ndjek ndonjë program tjetër studimi të ciklit të dytë, “Master Profesional” dhe “Master i Shkencave/Master i Arteve të Bukura”, në institucionet publike të Arsimit të Lartë.

Si do të bëhet përzgjedhja e kandidatëve fitues

Sa i takon përzgjedhjes së kandidatëve fitues, pranë dy Fakulteteve të Universitetit të Mjekësisë, për çdo program studimi të ciklit të dytë me kohë të plote do të ngrihen komisione të posaçme, sipas fushave përkatëse, në përputhje me kriteret e pranimit të vendosura dhe të shpallura publikisht.

Kur shpallen fituesit

Brenda orës 16.00, të datës 05.10.2013, Universiteti i Mjekësisë, do të publikojë dhe afishojë listat e aplikantëve fitues në faqen zyrtare të internetit www.umed.edu.al dhe në mjediset e sekretarive mësimore të dy Fakulteteve përkatëse, të ndarë sipas programeve të studimit përkatës, të renditur sipas rendit zbritës të pikëve të grumbulluara nga aplikantët, në përputhje me kuotat e pranimeve, të miratuara sipas Vendimit nr.744, datë 05.09.2013, të Këshillit të Ministrave.

Regjistrimi përfundimtar i fituesve

Regjistrimi i aplikantëve në programet e studimit ku janë shpallur fitues do të zhvillohet nga data 07.10.2013 deri në datën 11.10. 2013, nga ora 08:00 deri në orën 16:00 pranë sekretarive mësimore të dy Fakulteteve përkatëse të Universitetit të Mjekësisë. Ndërkohë, dokumentat e aplikantëve jo fitues do t’u kthehen personave kundrejt kërkesës së tyre. Për regjistrimin, kandidati duhet të paraqitet personalisht pranë sekretarive mësimore dhe të paraqesë në origjinal dokumentet e sjellë më parë në fotokopje të noterizuar. Kandidatët që rezultojnë të regjistruar në programe të tjera studimi të ciklit të parë, ose të dytë, me kohë të plotë apo të pjesshme, në IAL-të publike, nuk marrin numër matrikulimi dhe do të ç’regjistrohen.

Edlira Mema

Institucionet e Arsimit të Lartë kanë publikuar gjatë këtyre ditëve listën e plotë të personave të cilët janë shpallur fitues në të gjitha programet e studimit për vitin akademik 2013-2014. Kështu, Universiteti i Arteve në vijim të udhëzimit të Ministrisë së Arsimit, ka publikuar listët e fituesve listën e fituesve në ato programe studimi që ofron. Konkretisht, bëhet fjalë për fituesit në programet e Fakultetit të Muzikës, të Artit Skenik dhe Arteve të Bukura. Po kështu, Ministria e Arsimit ka publikuar edhe udhëzimin që do të ndjekin kandidatët për regjistrim. Kështu, sipas tij kandidatët për të kryer regjistrimin on-line duhet të shkojnë linkun: http://matura.akp.gov.al; “Për t’u regjistruar në fakultet, në fazën e parë, duhet të klikoni butonin: “Regjistrohu”. Pasi klikoni te ky buton në adresën tuaj të e-mail-it do t’ju dërgohet një mesazh konfirmues, i cili ju njofton se jeni regjistruar tek programi i studimit në të cilin jeni shpallur fitues. Studenti/ja, gjatë javës së parë të frekuentimit të studimeve universitare në programin e studimit ku është shpallur fitues , dorëzon pranë sekretarisë mësimore të fakultetit përkatës, dokumentet plotësuese të mëposhtëm:
a) Dokumentin e identifikimit (kartë identiteti ose pasaportë). Në dosje mbahet vetëm
fotokopja e njërit prej dokumenteve të identifikimit;
b) 2 fotografi;
c) Mandat arkëtimi i tarifës së regjistrimit prej 1.600 lekësh, paguar pranë zyrave të postës shqiptare, për llogari të IALP-së përkatëse”-thuhet në udhëzim.

Osman Dedja

Shqipëria bëhet pjesë e Forumit Global për Çrregullimin e spektrit Autik, I cili u themelua nga mbi 30 shtete që morën pjesë në mbledhjen e parë të Nivelit të Lartë të Organizatës Botërore të Shëndetësisë (OBSH) mbi çështjet e këtij çrregullimi dhe ato të zhvillimit,  që u mbajt në Gjenevë  në data 16-18 shtator 2013  . Shqipëria në këtë Takim u përfaqësua nga Zonja Liri Berisha, presidente e Fondacionit Fëmijët Shqiptar dhe Qendrës Rajonale për Autizmin. Kjo mbledhje e organizuar me propozim të shoqatës Autism Speaks, në SHBA,  dhe ku morën pjesë më shumë se 80 pjesëmarrës nga e gjithë bota, shënoi një sukses të jashtëzakonshëm në përpjekjet globale për mobilizimin e shumë aktorëve si dhe ne gjetjen e zgjidhjeve të qëndrueshme në ndihmë të personave të prekur nga autizmi. Dr. Liri Berisha e nxitur nga interesi I anëtarëve te kësaj tryeze konsultative, se cilat mund të ishin ato ndërhyrje që  duhet të mbështeten për të dhёnё ndikim të matshëm dhe përmirësim të gjendjes shëndetësore tek personat  me ÇSA u përgjigj: “ Ne duhet të mbështesim ndërhyrjet që kanë treguar se janë efektive në mjedise apo situata të ndryshme, duke përfshirë edhe vendet me pak burime dhe kapacitete siç është ndërhyrja (trajtimi) i kryer nga individë jo-profesionistë, si për shembull anëtarët e familjes apo punonjësit social pranë komuniteteve. Këtu i referohem  një projekti shumë të rëndësishëm që po implementohet në Shqipëri, i Prof. Deborah Fein dhe Fondacionit Fëmijët Shqiptarë, i financuar nga Autism Speaks, i cili do prodhojë një CD për trajnimin e prindërve dhe do të masë efektivitetin e terapisë të ofruar nga këta prindër në raport me fëmijët që nuk marrin terapi. Pra, ne duhet të shikojmë eksperiencat apo rastet dhe të përdorim ato te cilat kane treguar se janë efektive”. Në fjalën mbyllëse të mbajtur nga Shekhar Saxena, drejtor i shëndetit mendor  në OBSH,  pasi u nënvizua suksesi i këtij eventi, u njoftua krijimi I   Forumit Global për Çrregullimet e Spektrit Autik  ndërsa u përcaktua një plan veprimi për rolin e OBSH në këtë drejtim. Zoti Andy Shih, dretues shkencor në organizatën e Autism Speaks dhe kryesues në sesionin plenar,  ndërmjet të tjerash i  adresoi një falënderim të veçantë Zonjës Liri Berisha dhe Fondacionit Fëmijët Shqiptarë  për  progresin e shënuar në Shqipëri në rrugën e ndërgjegjësimit për autizmin, ndërtimin dhe vënien në efiçencë të një strukture për depistimin dhe edukimin e fëmijëve autikë  por dhe rolin kyç që ka luajtur në rajon duke u shndërruar në Përfaqësues Rajonal për Autizmin. Pjesëmarrësit përfshinin përfaqësues te qeverive, përfaqësues te shoqërisë civile, fondacione dhe shoqata, përfaqësues të botës akademike, përfaqësues të instituteve të kërkimeve gjenetike  si dhe vetë drejtues të OBSH etj.

Stina e artë e vitit zyrtarisht me kalendarit nis sot. Stina e tretë e vitit, vjeshta, në hemisferën veriore të Tokës fillon sot në orën 16:49. Në këtë kohë, në hemisferën jugore fillon pranvera. Vjeshta zgjat deri më 21 dhjetor në orën 12:12, kur fillon dimri. Dhe në fakt në vendin tonë, Vjeshta ka nisur të ndihet lehtë dhe kjo nga temperaturat që kanë rënë me rreth 15 gradë, krahasuar më stinën e verës, ku maksimalja kaloi 40 gradë Celsius.

Instituti Italian i Kulturës publikon listën e personave që do të japin provimin me shkrim dhe me gojë për Certifikatat Celi 2, 3, 4 dhe 5, lëshuar nga Universiteti për të huaj i Perugias-s. Prova me shkrim do të zhvillohen në Tiranë, të hënën më 18 nëntor 2013. Të gjithë kandidatët e Celi-3 duhet të paraqiten në orën 8:00 pranë Universitetit Polis (Autostrada për në Durrës, Km 5 pranë QTU, Salla B1/B3/B5 kati II, Salla C1 kati III). Ndërsa të gjithë kandidatët e Celi 2, Celi 4 e Celi 5 duhet të paraqiten në orën 8:00 pranë Institutit Italian të Kulturës (Pallati i Kulturës kati II, Sheshi Skëndërbej, Tiranë). Kandidatët duhet të paraqesin në momentin e hyrjes: Dokumentin e identifikimit ende të vlefshëm (Pasaportë të firmosur, Kartën e identitetit ose patentën e re); si dhe duhet të kenë me vete stilolaps, pasi është i ndaluar përdorimi i lapsit. Po ashtu është e ndaluar futja në ambientet e provimit të çfarëdo lloj materiali (libër, fletore, fjalorë etj, ), si dhe celularë.

Prova me gojë

Të gjitha provimet me gojë do të zhvillohen pranë Institutit Italian të Kulturës (Pallati i Kulturës, kati II, Sheshi Skëndërbej – Tiranë) të hënën më 18 nëntor (pasdite) dhe të martë më 19 nëntor (paradite e pasdite) sipas orareve të treguar në kalendar.

(listen e gjeni ne numrin e sotem te gazetes)

Osman Dedja

Ish-të përndjekurit politikë kërkojnë nga qeveria ‘Rama’ t’i zhdëmtojë për vitet e persekutimit politik që kanë vuajtur në kohën e diktaturës. Përfaqësuesi i ish-të përndjekurve Skënder Tufa bëri të ditur se i kërkojnë qeverisë të shikojë kërkesat e tyre pasi gjendja e kësaj kategorie sa vjen e rëndohet. “Gjendja jonë si në qeverinë e kaluar. Asnjë ndryshim. Qeveria të na zhdëmtojë”, tha Tufa.

Ministri i Mirëqënies Sociale dhe Rinisë Erjon Veliaj i drejtohet me një apel qytetarëve që t’i bashkohen nismës kombëtare për pastrimin e vendit që mbahet me datën 22 Nëntor. Në një dalje për mediat, Veliaj tha se sensibiliteti i krijuar për çështjen e armëve kimike duhet të reflektohet me veprime konkrete në pastrimin e ambientit, për të dhënë një mesazh edhe për komunitetin ndërkombëtar. Aksionit kombëtar të datës 22 nëntor do t’i bashkohen të gjitha dikasteret qeveritare dhe deputetët e Kuvendit, të cilët do të organizohen për pastrimin e vendit nga mbetjet.

Autoriteti Kombëtar i Ushqimit ka ndërmarr një aksion kontrolli në disa rrethe të vendit sa i takon kushteve higjeno-sanitare të vendeve ku tregtohen produkte të mishit. Kështu, në kuadër të zbatimit të ligjit për vendosjen e standardeve higjienike dhe ligjore të tregtimit të mishit dhe kafshëve të gjalla, në mbarë vendin, Task Force, zhvilloi përgjatë të premtes e të shtunës, inspektime në Tiranë dhe qytete tjera të vendit. Bazuar në Ligjin Nr.87/2012 për miratimin e Aktit Normativ me fuqinë e ligjit, Nr.4 datë 16.08.2012 “Për përcaktimin e rregullave për therjen e kafshëve dhe tregtimin e mishit të tyre” me inicimin e Prefektit të Tiranës, vetëm në qarkun Tiranë, në datë 13.11.2013 u ngrit grupi Task Force me pjesëmarrjen e të gjithë aktorëve të tjerë pjesëmarrës të përfshirë në Aktin Normativ; Prefekturës, Ministrisë së Mjedisit, INUK-ut, Drejtorisë së Tatimeve dhe efektive të Ministrisë së Brendshme.

Bllokohen disa subjekte

Kjo solli një rritje me 45 inspektime në qarkun Tiranë, nga te cilat 6 pika therje dhe 39 njësi të tregtimi të mishit. U bllokuan 36 subjekte, të cilat tregtojnë dhe therin mish, si dhe u konfiskuan 153 kg mish, mjete pune dhe u morën 14 masa administrative, gjoba, në subjekte, të cilat nuk plotësonin kushtet e Aktit Normativ (shifrat janë të inspektimeve deri ditën e premte, datë 15 nëntor 2013, ndërsa aksioni ka vijuar edhe ditën e shtunë). Gjithashtu gjatë periudhës 01.11.2013 deri më datë 14.11.2013, edhe pse nuk ka funksionuar grupi Task-Force, por vetëm inspektime nga AKU-ja, është rritur me 260 numri i inspektimeve në rang kombëtar. Kryesisht, rritja e numrit të inspektimeve ka ndodhur në qarkun Tiranë me 77 inspektime , në qarkun Durrës me 32 inspektime, në Shkodër 35 inspektime, në Korçë me 34 inspektime dhe në Lezhë me 24 inspektime. Përgjatë inspektimeve të ditës së premte dhe shtunë, u vu re, se pas aksionit të AKU-së dhe Task Forcës së ngritur për këtë qëllim, shumë njësi tregtare të mishit, apo therjes së gjësë së gjallë, kanë nisur punën për përmirësimin e ambienteve të tyre, me qëllim plotësimin e kushteve dhe standardeve nё përputhje me zbatimin e ligjit. Duke theksuar, se Task Forcё do tё vijojë aksionin e nisur, AKU iu bën thirrje tregtarëve që të zbatojnë me plotësimin e standardeve dhe kushteve higjeno-sanitare, si dhe iu bën thirrje qytetarëve, që të jenë të kujdesshëm për vendet ku blejnë mish apo nënprodukte të tij.

Drejtoria Rajonale e AKU-së për Qarkun e Vlorës, me drejtues të ri

Nga dita e premte, Drejtoria Rajonale e AKU-së për Qarkun e Vlorës, ka kreun e saj të ri. Renato Banushaj është emëruar dje në krye të Drejtorisë Rajonale të Autoritetit Kombëtar të Ushqimit. Prefekti i Vlorës Besnik Dervishi, duke folur për rëndësinë e AKU-së, si një institucion i ri dhe me legjislacion të ri, deklaroi, se fokusi i punës së saj, është mjaft i rëndësishëm për jetën e qytetarëve. Ndërsa drejtori i sapoemëruar, Banushaj, duke shprehur gatishmërinë e tij për t’i shërbyer sa më mirë qytetarëve, kërkoi dhe bashkërendim të punëve me institucionet tjera lokale, “me qëllim që AKU të funksionojë sa më mirë, në zbatim të ligjit”.

Edlira Mema

Prej kohësh procesi i dëmshpërblimit financiar për ish-të përndjekurit politikë është bllokuar. Në muajin shtator, Ministria e Financave ka publikuar listëpagesën e fundit për likuidimin e një prej kësteve të të përndjekurve të regjimit komunist. Kështu, sipas burimeve pranë këtij institucioni, në fillim të vitit që vjen pritet të zhbllokohet fondi për ish-të përndjekurit. Ndërkohë, një ndër kategoritë që do të trajtohet me përparësi për marrjen e dëmshpërblimit janë të gjithë ata ish-të dënuar që vuajnë nga të ashtuquajturat “sëmundje të rënda”, për vitet e burgut që kanë bërë gjatë regjimit komunist. Kështu, prej kohësh, me anë të një udhëzimi të posaçëm të krijuar nga Ministria e Shëndetësisë dhe Ministria e Financave, “Për dokumentacionin dhe procedurat e dhënies me përparësi të pagesës së dëmshpërblimit për ish-të përndjekurit politikë dhe familjarët e tyre, që vuajnë nga sëmundjet e rënda”, përcaktohen qartë të gjitha hapat që duhet të ndjekin përfituesit në këtë rast. Kështu, në mbështetje të ligjit nr. 9831,datë 12.11.2007, “Për dëmshpërblimin e ish të Dënuarve Politikë të Regjimit Komunist”, të ndryshuar, të Vendimit të Këshillit të Ministrave Nr. 419, datë 14.04.2011, “Për miratimin e afateve dhe skemës së dëmshpërblimit për ish të Dënuarit Politikë të regjimit Komunist”, me qëllim përcaktimin e dokumentacionit dhe procedurave të dhënies me përparësi të pagesës së dëmshpërblimit për ish të dënuarit politikë dhe familjarëve të tyre, që vuajnë nga sëmundjet e rënda, Ministria e Financave dhe Ministria e Shëndetësisë kanë udhëzuar këtë vendim.

Kategoritë e të sëmurëve që përfitojnë

Ndërkohë, duke u mbështetur në këtë udhëzim, përcaktohen dy kategori që u lind e drejta për përfitim me përparësi të dëmshpërblimit. Kategoria e parë janë ata persona ish të dënuar që vërtetojnë me anë të një vërtetimi përkatëse së janë të paaftë të përhershëm në punë. Ndërsa kategoria e dytë përfshin të gjithë ata persona që vuajnë nga sëmundjet e gjakut. Për të dyja kategoritë e përfituesve duhet të përcaktohet paaftësia e përhershme në punë dhe duhet një akt ligjor spitalor me firmën e anëtarëve të komisionit dhe kryetarit të Komisionit KMCAP.

Dokumentacionet që duhet të plotësojnë të interesuarit

Dokumentacioni dhe procedurat që nevojiten për dhënien me përparësi të pagesës së dëmshpërblimit për ish të dënuarit politikë nga regjimi komunist ose e familjarëve të tyre, të cilët vuajnë nga sëmundjet e rënda, do të jetë për kategoritë e mëposhtme;
a- Të dënuarit politikë ose familjarët e tyre, të cilët nga Komisioni Mjekësor i Caktimit të Aftësisë për Punë (KMCAP) janë vlerësuar me humbje të plotë të aftësisë për punë.
Për të përfituar përparësi në dhënien e pagesës duhet të paraqitet pranë Sektorit të Pagesave për ish të Përndjekurit Politik këto dokumenta;
- Vendimin e KMCAP, i cili vërteton humbjen e plotë të aftësisë në punë.
- Ky është dokumenti bazë juridiko-mjekësor-administrativ që njeh të drejtën për përfitime sipas shkallës së humbjes së aftësisë në punë.
- Dokumenti duhet të jetë i plotësuar saktë sipas kërkesave të formatit, me shkrim të lexueshëm, pa korrigjime.
- Dokumenti duhet të ketë të shkruar emrin dhe mbiemrin e anëtarëve të KMCAP, nënshkrimin e tyre si dhe vulën e komisionit.
Procedura që respektohet është ajo që ndiqet për paraqitjen në KMCAP, për përfitimin e paaftësisë për punë. Ndërkohë ky dokument dorëzohet në zyrën e ngarkuar për dhënien e dëmshpërblimit, e cila është dhe Sektori i Pagesave për ish të Përndjekurit Politik.
b- Të dënuarit politikë ose famijarët e viktimave të cilët vuajnë nga sëmundjet malinje onlokogjike ose hematologjike (sëmundje të gjakut).
Duke qenë se patalogjia onko-hematologjike trajtohen kryesisht në spitalet universitare, dukumenti sipas sëmundjes do të lëshohet vetëm nga :
- Qendra Spitalore Universitare “Nënë Tereza”;
- Spitali Universitar i Sëmundjeve të Mushkërive ‘Shefqet Ndroqi”;
- Spitali Universiatar Obsetrik-Gjinekologjik “Mbetëresha Geraldinë”;
- Spitali Universitar Obsetrik-Gjinekologjik “Koço Glozheni”.

Përfituesit duhet të zotërojnë:

- Një epikrizë të lëshuar nga shërbimet përkatëse në institucionet universitare të sipërpërmendura, ku të përshkruhet diagnoza dhe stadi i sëmundjes;
- Kjo eprikrizë përgatitet nga mjeku që trajton të sëmurin, sipas specialiteteve dhe nënshtruhet me emër dhe mbiemrin e mjekut kurues;
- Shefi i shërbimit duhet të vërtetojë saktësinë e diagnozës dhe ta nënshkruajë këtë dokument;
- Së fundi epikriza firmoset nga drejtuesi i institucionit shtetëror me vulën përkatëse.

Rruga që duhet të ndjek i dënuari politikë, pjesë e dy kategorive përfituese

Përfitusit për tu pajisur me dokumentin e sipërcituar duhet të zbatojnë sistemin e referimit në shërbimin shëndetësor;
Si fillim i interesuari duhet të paraqitet tek mjeku i familjes, me një vërtetim të lëshuar nga zyra përkatëse e Komitetit Shtetëror të të Përndjekurve Politikë, i cili vërteton se personi bën pjesë në pikën 3 të vendimit. Më pas mjeku i familjes e referon të sëmurin tek specialisti përkatës. Nga ana e vetë mjeku specialist, sipas sëmundjes e referon të sëmurin në shërbimet shëndetësore përkatëse, të institucioneve universitare të Tiranës. Më pas dokumentet paraqiten pranë zyrës së ngarkuar nga Ministria e Financave, që në këtë rast është Sektori i Pagesave për ish të Përndjekurit Politikë. Ndërkohë institucionet e ngarkuar në këtë udhëzim që do të plotësojnë dokumentacionin për efekt të këtij udhëzimi, duhet të shprehin me përpikëri të gjitha kriteret, që administrata më pas i zbaton.

Edlira Mema

Instituti i Sigurimeve Shoqërore publikon listën e ish-ushtarakëve, për të cilët është llogaritur përfitimi. Bëhet fjalë për 434 emrat që pas mbërritjes së dokumentacionit nga dikasteret e linjës, është kryer llogaritja. Konkretisht, në mbështetje të udhëzimit të ISSH-së dhe Ligjit nr. 10142, datë 15.05.2009, personave që e drejta për përfitim iu ka lindur nga data 27.06.2009 e në vazhdim, procedura e dorëzimit të dokumenteve edhe e caktimit të përfitimit do të jetë si më poshtë:
a)Inspektori i pensioneve suplementare, me paraqitjen e personave që përfitojnë nga Ligji Nr. 10142, datë 15.05..2009, në zyrën e sigurimit suplementar, vë në dispozicion të tyre dy kopje të kërkesës-format për pension të parakohshëm apo për pension suplementar pleqërie, sipas rastit, si dhe listës e dokumenteve që ata duhet të paraqesin;
b)Inspektori e regjistron kërkesën në regjistrin e posaçëm duke i vendosur dhe numrin përkatës, çel një dosje, në të cilën vendos kërkesën bashkë me dokumentet e sjella nga përfituesi, e plotëson atë me dokumentet e tjera që jepen nga sigurimet shoqërore dhe e vendos në pritje për ta bashkëlidhur edhe me dokumentet që priten të vijnë të plotësuara nga Ministritë apo institucionet përkatëse. Inspektori orienton përfituesin që një kopje të kërkesës ta dërgojë pranë Institucionit që e ka nxjerrë në lirim, i cili do të plotësojë dokumentet e parashikuara;
c) Me mbërritjen e dokumentacionit nga institucionet përgjegjëse për personin përfitues, inspektori i bashkon ato në dosjen përkatëse dhe brenda 2 ditëve, llogarit masën e pensionit, sipas përcaktimeve ligjore.

Rillogaritja

Rillogaritja e përfitimit kryhet nga inspektorë e degës së pensioneve, bazuar në këto dokumente dhe sipas procedurave të caktuara në Rregulloren Nr. 1, datë 21.10.2008. Përveç rregullave të përcaktuara më sipër, do të zbatohen edhe rregullat e caktuara në Ligjin nr. 9588, datë 25.07.2006 “Për rillogaritjen e pensioneve”, dhe në Vendimin përkatës të Këshillit të Ministrave për zbatimin e këtij Ligji, për efekt të rillogaritjes së pensionit të pleqërisë, sipas Ligjit nr. 7703, datë 11.05.1993, të ndryshuar, dhe për rillogaritjen e pensioneve suplementare, bazuar në Ligjin nr. 10142, datë 15.05.2009.

(listen e gjeni ne numrin e sotem te gazetes)

Osman Dedja

Publikohet lista e personave që do të kompensohen, pasi prona e tyre është zënë nga ndërtimet informale. Kështu, në mbështetje të Ligjit 9235 datë 29.07.2004, “Për Kthimin dhe Kompensimin e Pronës”, të ndryshuar, të VKM nr. 256, datë 13.04.2010 “Për mënyrën e organizimit dhe të funksionimit të Agjencisë së Kthimit dhe Kompensimit të Pronave ” të VKM-së nr. 383, datë 19.05.2010 “Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private që preken nga ndërtimet informale”, të ndryshuar pas miratimit të 22 kërkesave të subjekteve, AKKP urdhëron publikimin e listës për 21 kërkesa, të cilat përfitojnë nga kësti i parë, i dytë, i tretë dhe i katërt i përcaktuar për kompensimin në të holla prej 57% të vlerës totale të miratuar me VKM-të përkatëse dhe 1 kërkesë e cila përfiton nga kësti i katërt i kompensimit në të holla prej 10% të vlerës totale të miratuar me VKM-në përkatëse, të pronave që preken nga ndërtimet informale”. Gazeta “Republika” boton sot listën e plotë të pronarëve që përfitojnë kompensim.

Osman Dedja

Këshilli Mbikëqyrës i Albpetrol sh.a ka miratuar strukturën e re përmes së cilës do të kryhet ristrukturimi i plotë i Shoqërisë. Struktura e re e Shoqërisë është bazuar në Vendimin e Këshillit të Ministrave dhe udhëzimet e METE.

Struktura e re e Shoqërisë do të ketë 1868 punonjës dhe ky numër punonjësish parashikohet të arrihet nga Albpetrol sh.a. brenda tremujorit të parë të vitit 2014, pasi edhe procedura përkatëse kërkon zbatimin e disa afateve kohore. Riorganizimi i Shoqërisë është rakorduar aktualisht edhe me drejtuesit e Qendrave të Albpetrol sh.a. dhe specialistët e Burimeve Njerëzore të qendrave përkatëse.

Këshilli Mbikëqyrës i Shoqërisë Albpetrol sh.a, në bashkëpunim me Ministrinë e Energjetikës dhe Industrisë, ka vendosur mënyrën e trajtimit të punonjësve që do të dalin të papunë e si pasojë e ristrukturimit si më poshtë:

1. Shpërblim me një vit pagë për ndërprerje të marrëdhënieve të punës.

Këtë shpërblim e përfitojnë punonjësit aktualë të shoqërisë, të cilët janë në marrëdhënie punë me shoqërinë jo më pak se dy vjet pa ndërprerje deri në datën e hyrjes në fuqi të VKM nr 106 datë 01.02.2012.

2. Shpërblim për Vjetërsi Pune.

Ky shpërblim është të paktën sa paga e një 15-ditëshi mbi çdo vit pune të plotë që llogaritet në bazë të pagës që ekziston në përfundim të marrëdhënieve të punës. Kur paga është e ndryshueshme, shpërblimi llogaritet mbi mesataren e pagës të vitit paraardhës dhe indeksohet. Shpërblimin për vjetërsi e përfitojnë punonjësit aktualë të Shoqërisë që janë në marrëdhënie pune me këtë shoqëri jo më pak se 3 (tre)vjet pa ndërprerje deri në datën e hyrjes në fuqi të VKM nr 106 datë 01.02.2012.

Pas negociatave të kryera me vetë punonjësit janë miratuar listat për punonjësit që përfitojnë trajtim sipas VKM-së. Nga këto, 874 punonjës kanë përfituar menjëherë trajtimet përkatëse.

Shkurtimi me 134 punonjës të tjerë, sipas strukturës së re, do të realizohet brenda 3 mujorit të parë të vitit 2014. Për të gjithë punonjësit pagesa do të kryhet maksimalisht në 4 këste. Për sa i takon vjetërsisë në punë, data nga e cila do të fillojë përllogaritja e viteve të punës është data e themelimit të shoqërisë Albpetrol sh.a, 08.04.1999.

Ndërkohë së shpejti Shoqëria Albpetrol sh.a do të nisë testimin e të gjithë punonjësve të emëruar gjatë tre viteve të fundit. Qëllimi i këtij testimi është identifikimi i punonjësve që nuk kanë kualifikimin e duhur për të kryer proceset e punës në vendin ku janë emëruar. Rezultatet e testimit do të bëhen publike në përfundim të tij

Në kuadër të aksionit “Të mbajmë pastër Tiranën!”, Bashkia e Tiranës ka nisur pastrimin e vendgrumbullimit të paligjshëm te inerteve në kryeqytet. Janë 10 pika të nxehta të identifikuara, ku ka nisur pastrimi. Gjatë muajit nëntor, i shpallur prej dy vitesh si muaji i pastrimit nga Bashkia e Tiranës, do të zhvendosen 200 metra kub inerte dhe hapësirat e zëna prej tyre do u kthehen qytetarëve. Nënkryetari i Bashkisë së Tiranës Enno Bozdo ka parë nga afër punën që po kryhet në një prej këtyre vendgrumbullimeve. “Është kthyer në një traditë tashmë, që muaji nëntor të jetë muaji i pastrimit të thellë të bashkisë së Tiranës. Është një iniciativë që vijon prej dy vjetësh dhe sot jemi këtu për të njoftuar një aksion për pastrimin e 10 pikave të nxehta të mbetjeve inerte, të akumuluara prej shumë vitesh në bashkinë e Tiranës. Pikërisht në këtë pikë, brenda disa ditëve do të bëjmë të mundur eliminimin e 200 metra kub mbetje inerte dhe më pas sipërfaqja do të mbillet, do u kthehet banorëve në formën e një sheshi me lojëra dhe pushimi për fëmijët por kemi të identifikuara edhe 9 pika të tjera, aksioni për të cilat do të vazhdojë në ditët në vijim, deri në pastrimin e plotë të këtyre pikave inerte, të kthyera në problem, edhe pse përbëjnë rrezik për jetën dhe shëndetin e qytetarëve. Do të përmendja këtu rrugën “Haxhi Isuf Farka”, ”Osman Myderizi”, NSHRK, “Babë Rexha”, “Kongresi i Lushnjës”, rruga “Riza Cuka”, “Dritan Hoxha”, “Estref Frashëri”, rruga e Muzakëve dhe “Belul Hatibi” që është kjo pikë ku jemi ne sot. Dua të falënderoj në  veçanti nënkontraktorët dhe kontraktorët e Bashkisë së Tiranës, të cilët i janë përgjigjur thirrjes sonë për ndihmë me mjete të rënda dhe kanë vënë në dispozicion të gjithë mjetet e tyre por edhe të gjithë instrumentet që ato kanë në këtë aksion shumë të rëndësishëm të Bashkisë së Tiranës, për pastrimin dhe eliminimin e mbetjeve inerte”.

Mëngjesin e së hënës, dhjetëra nxënës të shkollës së mesme “Andon Zako Cajupi” protestuan për shkak të thyerjes së notës në sjellje nga drejtoria. E gjithë kjo situatë është krijuar për shkak të pjesëmarrjes së nxënësve në protestën kundër armëve kimike ka bërë që të penalizohen nga komisioni i disiplinës shkollore ku i rrezikohen provimet e maturës. Sipas përfaqësuesve të protestës kundër armëve kimike të cilët ishin të pranishëm në mbështetje të nxënësve ka pasur mbi 200 thyerje notash në sjellje ndërsa peticionet dërguar në adresë të drejtorit të shkollës nuk janë marrë parasysh. “Vendosja e vërejtjeve në regjistër është bërë me urdhër por pa një vendim të këshillit disiplinor. Me shumë mundësi këshilli disiplinor sot pra pasi është vendosur nota vërejtje vetëm për sa të formalizuar këtë vendim” tha Zirkon Disha. Vetë nxënësit nuk pranojnë t’i kthehen mësimit ndërsa sipas tyre protesta do vazhdojë deri në heqjen e vërejtjeve si dhe ndryshimin e penaliteteve ku vetëm për shkak të disa mungesave atyre u rrezikohen provimet. “Gjatë protestës që u bë për armët kimike, të gjithë nxënësit që morën pjesë atje morën vërejtje. Kjo gjë është e padrejtë sepse ne kemi të drejtë të shprehemi dhe të kërkojmë më të mirën për të ardhmen tonë.” u shpreh një nxënësit. “Ne i kemi dërguar një letër për të pasur një komunikim më të mirë. Kemi dërguar disa kushte por ai nuk e ka lexuar fare letrën dhe e ka hedhur poshtë. Ka shënuar në regjistrat tona vërejtje dhe gjithashtu edhe thyerje në notë në sjellje që shumë nxënës në këtë shkollë nuk futen në provimin e maturës”. tha një nxënës. Ditën e protestës në njërën nga klasat maturante vetëm 9 nxënës kanë qenë prezentë në orën e mësimit ndërsa për 28 të tjerë është marrë masa e thyerjes së notës në sjellje. Kjo tregohet dhe në këtë faqe regjistri ku nga 38 nxënës që ka klasa 28 prej tyre mungonin për shkak të pjesëmarrjes në protestën kundër armëve kimike. Nga ana tjetër drejtori i këtij institucioni arsimor Vladimir Boneci tha se nxënësit duhet t’i rikthehen mësimit ndërsa asnjëri prej tyre nuk rrezikon provimet e maturës. “Mbas lajmërimit që i bëmë prindërve për një thyerje të disiplinës, nxënësit të vijnë në shkollë dhe jo vetëm që nuk do të marrin masë por nuk të t’u vihet as mungesë. Masat që kemi menduar ne, të cilat do t’i rishikojmë kanë qenë vetëm qortim edhe vërejtje.” tha Vladimir Boneci, Drejtor i Shkollës së mesme Andon Zako Cajupi. Nxënësit u shprehën se do të vazhdojnë me bojkotimin e orëve të mësimit nëse kërkesat e tyre nuk plotësohen deri në heqjen e thyerjes së notave në sjellje ndërsa pritet një përgjigje nga drejtoria e këtij institucioni arsimor.

Vazhdojnë të regjistrohen shifra negative në qytetin e Elbasanit, për sa i përket sëmundjeve qe prekin banoret e tij. Sikur te mos mjaftojnë problemet e shumta te shkaktuara si pasoje e ndotjes se larte te mjedisit, diabeti është një tjetër sëmundje qe po shënon rritje tepër alarmante. Në një prononcim për mediat,  Shefqet Deliallisi, mjek endokrinolog bën me dije se vetëm gjate një viti ne këtë qytet regjistrohen rreth 400 raste te diagnostikuar me këtë sëmundje, shifër ekstreme kjo krahasuar me 30 vjet me pare, ku për te njëjtën periudhe kohe regjistroheshin vetëm 35 raste te tilla. Kjo sëmundje po përhapet jashtëzakonisht shume ne vendin tone dhe me te rrezikuarit prej saj, janë kryesisht personat mbi 45- vjeç. Diabeti ose siç njihet ndryshe dhe si sëmundja e sheqerit, ka si shkak kryesor shumicën e glukozës në gjak, e cila krijon çrregullime në metabolizmin e trupit të njeriut,ndaj dhe mjeket rekomandojnë kryerjen e analizave ne mënyrë te rregullt me qellim parandalimin e kësaj sëmundjeje.

Në Ditën Ndërkombëtare Kundër Dhunës ndaj Fëmijëve, Ministria e Mirëqenies Sociale dhe Rinisë mikpriti në ambientet e saj rreth 40 fëmijë nga shkollat e mesme, Sami Frashëri, Qemal Stafa, Ismail Qemali, fëmijë me nevoja të veçanta, fëmijë që vijnë nga përkujdesi rezidencial, fëmijë që vijnë nga familje me probleme varfërie, fëmijë në situatë rruge etj. Ky aktivitet ishte i pari në llojin e tij, në kuadër edhe të praktikës së bazuar në ‘Artikullin 12’ të Konventës për të Drejtat e Fëmijëve për përfshirjen e tyre në vendimmarrjet që ndikojnë në jetën e tyre. Kështu, për sëmundjet e rralla tek fëmijët të cilët kanë një kosto të lartë, por edhe për analizat  e shtrenjta, Ministria e Shëndetësisë do të fillojë shumë shpejt të zbatojë një strategji të posaçme, në bazë të së cilës të gjitha shpenzimet do të mbulohen nga sistemi shëndetësor. Kjo ka qenë deklarata e kreut të shëndetësisë Ilir Beqja gjatë një tryeze me fëmijë me aftësi të kufizuara. “Të parandalojmë shfaqen e këtyre sëmundjeve që në periudhën e shtatzënisë së nënës duke filluar disa kontrolle të veçanta kontrolli paraprak. Do të përpiqemi të krijojmë një program të veçantë që të përballoj shpenzimet shumë të kushtueshme të analizave për këto çështje. Pavarësisht se këto analiza do të bëhen apo jo së afërmi në Shqipëri, përballimin e shpenzimeve të tyre dhe procedurën e ekzaminimit në vendet jo në Shqipëri do t’i marrë përsipër sistemi jonë shëndetësor.”-tha Ilir Beqja, ministër i Shëndetësisë. Një premtim tjetër për fëmijët me probleme shëndetësore, por edhe për ata që strehohen në shtëpitë e fëmijës, ka ardhur edhe nga ministri i rinisë dhe mirëqenies sociale Erjon Veliaj. Ministri u shpreh se do të fillojë të aplikohet një program për strehimin e të rinjve edhe pas moshës 16-vjeç, si dhe të ndiqen më shumë politika sociale. “Propozimi ishte që ne ndoshta për arsye dhe të rritjes dhe të moshës së adoleshencës, ndoshta nuk mund t’i mbajmë 18-vjeçarët në të njëjtat institucione më foshnjet. Pra ne duhet të ndajmë moshën e gjimnazit 14 – 18 vjeç në një pjesë të godinës ose në një godinë tjetër por ende brenda institucionit dhe jo lënien të lirë.”- tha Erjon Veliaj, ministër i Mirëqenies Sociale dhe Rinisë.  Ndërsa ministrja e Arsimit, Lindita Nikolla ka premtuar lehtësi për arsimin e fëmijëve me aftësi të kufizuar dhe programe të posaçme për to. Konsultimit i parapriu edhe një ekspozitë me foto e fëmijëve me nevoja të veçanta nga Elbasani, ndërsa gjatë kohës së drekës, mjediset e Ministrisë i vizituan edhe fëmijë nga Qendra Transitore dhe fëmijë të Shtëpisë së fëmijës Zyber Hallulli, të cilët ndoqën teatrin e Të Drejtave të Fëmijëve. Ky aktivitet u organizua në bashkëpunim me Koalicionin “Bashkë për Kujdesin Tërësor të Fëmijëve” (BKTF), me mbështetjen e World Vision (WV). Ministria e Mirëqenies Sociale dhe Rinisë e ndërmori këtë  proces për të krijuar hapësirën e sigurt që fëmijët dhe të rinjtë, të  kenë mundësi të njihen nga afër me programet e ndryshme, të prezantohen me punën dhe programet e ministrive respektive, si dhe për të diskutuar çështjet shqetësuese përmes dialogut dhe diskutimit të drejtpërdrejtë me fëmijët. Gjatë takimit me përfaqësues të qeverisë,  fëmijët ngritën pyetje në lidhje me shqetësimet dhe problemet që hasin ata në jetën e përditshme: mbi aksesin në shërbime arsimore, sociale, ekonomike, shëndetësore; arsimin cilësor; martesat e hershme, mbështetjen e fëmijëve të sëmurë; mbrojtjen dhe ofrimin e shërbimeve për fëmijët që largohen nga përkujdesi në moshën 16 vjeçare, fëmijët e shfrytëzuar për punë; reduktimin e dhunës ndaj fëmijëve etj. Vetë ministrat morën përsipër të sigurojnë zbatimin e të drejtave të fëmijëve dhe mbrojtjen e tyre. Përfaqësuesit e qeverisë kërkuan që takime të tilla konsultuese të bëhen vazhdimisht në mënyrë që, jo vetëm të promovohet pjesëmarrja e fëmijëve në vendime që u përkasin, por edhe që vetë fëmijët të monitorojnë ecurinë e zbatimit të kërkesave të tyre. “Dialogë të tillë i sjellin më afër institucionet përgjegjëse dhe fëmijët. Sot u duk se sa e rëndësishme është që vetë fëmijët, përfshirë ata me aftësi ndryshe, të jenë pjesëmarrës në vendimet që prekin drejtpërdrejtë jetët e tyre”, u shpreh Ridiona Stana, menaxhere për programin e Mbrojtjes së Fëmijëve në World Vision.

Sot është Dita Ndërkombëtare e Fëmijëve.

E themeluar nga Kombet e Bashkuara në vitin 1954, Dita Ndërkombëtare e Fëmijëve synon të promovojë mirëqenien e fëmijëve kudo, si dhe të inkurajojë mirëkuptimin ndërmjet fëmijëve në gjithë botën.

Gjithashtu në 20 nëntor Asambleja e Përgjithshme e Kombeve të Bashkuara ka miratuar Deklaratën e të Drejtave të Fëmijës në vitin 1959 dhe Konventën e të Drejtave të Fëmijës më 1989.

Reshjet e shiut të shoqëruara herë pas herë edhe me stuhi ere kryesisht në det do të vazhdojnë të jenë prezente edhe gjatë ditës së sotme. Kjo situatë sinoptike do të ketë një përmirësim vetëm ditën e premte, por paqëndrueshmëria e motit do të vazhdojë të mbizotërojë deri në fund të ditës së dielë. Sipas metereologëve këto janë pasojat e ciklonit “Klepatra” që ka përfshirë gjithë pellgun e mesdheut. “Ky ciklon ka prekur më shumë pjesën perëndimore, domethënë ka shpëtuar e gjithë zona malore juglindore, veriore. Në Korçë janë shënuar sasi shiu shumë të pakta. Mbetet situata shumë e paqëndrueshme, pra edhe sot mbasdite dhe gjatë natës. do të jenë në intensitete mesatare dhe të dobëta. Gjatë këtyre ditëve dhe gjatë fundjavës nuk do ketë luhatje të madhe të temperaturave në vlerat minimale. Rënia më e ndjeshme do të jetë në vlerat maksimale dhe kjo për shkak të shirave që do jenë të pranishëm në mesditë dhe pjesën e dytë të ditës”- tha Lajda Porja. Metereologët thonë se situata sinoptike do të ndikojë edhe në qarkullimin  e mjeteve në det. Ata parashikojnë që shpejtësia e rës të shkojë deri në 55 km në orë gjatës natës së ditës së sotme, duke bërë që në det të ketë dallgë disa ballëshe. Cikloni “Kleopatra” sipas metereologëve është tipik për rajonin e Mesdheut në këtë periudhe të vitit, kjo si pasojë e bashkimit të ajrit të ftohtë që vjen nga Antlantiku i veriut drejt Detit Mesdhe ku temperaturat janë të larta.

Institucionet shëndetësore duhet të plotësojnë kushtet për licencën sa i takon procesit të akreditimit. Pavarësisht se ato kanë vite që  ekzistojnë në shërbim të pacientëve shqiptarë, ato duhet të ofrojnë kushtet më minimale, ndërkohë që në realitet shumë prej tyre nuk i kanë dhe sërish vazhdojnë të jenë të hapura. Kjo ka qenë deklarata e kreut të qendrës së akreditimit, cilësisë dhe sigurisë së institucione shëndetësore Isuf Kalo. Ai u shpreh se është e nevojshme që në buxhetet që miratohet të ketë një zë të veçantë vetëm për cilësinë dhe sigurinë. Ndërsa përfaqësuesit e shëndetësisë e ka cilësuar akreditimin e këtyre institucioneve si një mekanizëm që lufton korrupsionin. “Licensim do të thotë që të ketë zbatuar të paktën standardet minimale, pa të cilat institucione nuk do të mund të funksionojë. Por kemi trashëguar të gjitha spitalet, të cilat nuk kanë një pjesë të standardeve minimale”- tha Isuf Kalo. “Ministria e shëndetësisë është e angazhuar që të skicojë dhe të identifikojë dhe mekanizmat antikorrupsion dhe ne besojmë që mekanizmi i akreditimit është mekanizm i rëndësishëm që ndërhyn në sistem për të luftuar korrupsionin në shëndetësi”- tha Gazmend Bejtja.  Ndërsa përfaqësuesit e grupit që merret me hartimin e dokumentit që do ët përdoret për akreditmin e institucioneve shëndestore, u shprehën se duhet të ketë një mirëmenaxhim në spitale, pasi edhe kjo është pjesë e këtij procesi. “Kjo infrastrukturë, përveç gjithë standardeve të tjera, që përbën edhe asetin kryesor përvec burimeve njerëzore që është e para, ka ndodhur për arsye se aparatura që për pak investim  mbeten të tëra pa u vënë në eficencë”- tha Bajram Hysa. Në Shqipëri aktualisht procesi i akreditmit  përsa i përket ambienteve, teknologjisë apo cilësisë së shërbimit nuk ka nisur në asnjë spital  publik, ndërkohë që  akreditimi është një proçes që po prek vetëm personelin shëndetësor.

Ambasada Italiane dhe Posta Shqiptare nënshkruajnë marrëveshjen

Tarifat e reja për përkthimin dhe legalizimin e dëshmive. Pagesat për shërbimin postar. Rregullt që do të ndjekin qytetarët për aplikim

 Me qëllim lehtësimin dhe përshpejtimin e procedurave të përkthimit dhe legalizimit, si dhe për të ulur shpenzimet e qytetarëve, Ambasada e Italisë ka nënshkruar një marrëveshje me Postën Shqiptare, falë se cilës, duke nisur nga data 1 dhjetor 2013, personat e interesuar mund të paraqiten një herë të vetme pranë Zyrave Postare për të kërkuar njëkohësisht Vulën Apostile dhe përkthim/legalizimin nga ana e Zyrës konsullore te Ambasadës. Marrëveshja e re, përveçse do të lehtësoje procedurat për publikun, do te bëjë të mundur të ulet ndjeshëm koha e nevojshme për legalizimin e dokumenteve (do te jenë të mjaftueshme vetëm 7 ditë pune për të marrë,  si vulën apostile,  ashtu edhe përkthimin ose legalizimin, me përjashtim të rasteve te jashtëzakonshme) dhe do te ulë shpenzimet për qytetarët. Veç tarifave të shërbimit konsullor dhe vulës apostile, qytetarit do t’i duhet të paguajë për shërbimin postar 350 lekë, në rast se do të paraqesë dokumentet në Tiranë,  ose 500 lekë nëse do të dorëzojë dokumentet në njërin nga 8 qytetet tek të cilët është funksional shërbimi.  Shërbimi do te jete aktiv në Zyrat Postare qendrore të Tiranës, Durrësit, Elbasanit, Pogradecit, Korçës, Shkodrës, Lezhës, Kukësit e Peshkopisë. Marrëveshja do të nënshkruhet sot orën 11.00, pranë Ambasadës së Italisë në Tiranë, nga Ambasadori Massimo Gaiani dhe Drejtori i Përgjithshëm i Postës Shqiptare Ardit Çela.

 Mënyrat e funksionimit të shërbimit

 1) Paraqitja e dokumenteve me ose pa përkthim:

 Ambasada italiane kryen ekskluzivisht përkthimet në italisht të dokumenteve të mëposhtme: certifikatave të gjendjes civile (certifikatë lindjeje, certifikatë personale, certifikatë të gjendjes familjare, certifikatë të trungut familjar, Ekstrakt akti lindjeje, ekstrakt të aktit të martesës, certifikatë martese, certifikatë vdekjeje) dhe dëshmi penaliteti. Pra, këto lloj dokumentesh mund të dorëzohen  të pa përkthyera në Zyrat Postare. Ndërsa, të gjitha dokumentet e tjerë duhet detyrimisht të dorëzohen në Zyrat Postare, të pajisura me përkthimin në gjuhën italiane, te kryer ekskluzivisht nga Instituti Italian i Kulturës, ose nga një përkthyes i betuar i njohur nga Ministria e Drejtësisë shqiptare (për listën e përkthyesve klikoni këtu). Ambasada Italiane, në këto raste, do të marrë përsipër legalizimin e firmës së përkthyesit të betuar ose të funksionarit të Institutit Italian të Kulturës, i cili ka kryer përkthimin.

 2) Procedurat e paraqitjes së dokumenteve:

 Qytetari duhet thjesht të drejtohet në njërën nga 9 Zyrat Postare të autorizuara, gjatë orareve zyrtare të zakonshme dhe pa e pasur të nevojshme të caktojë paraprakisht një takim, duke kërkuar shërbimin e kombinuar të Apostilës/Legalizimit pranë Ambasadës Italiane, duke paraqitur dokumentet me ose pa përkthim, në varësi të llojit të dokumentit (shih piken 1). Zyra Postare do t’i kërkojë qytetarit të plotësojë një formular i cili përmban të dhënat e tij personale dhe kontaktet telefonike (për çfarëdolloj komunikimi nga ana e Ambasadës) dhe do të kthejë dokumentet, të pajisura me vulën Apostile dhe përkthimin/legalizimin, brenda 7 ditë pune ( përveçse në rastet e jashtëzakonshme, për të cilat publiku do të jetë njoftuar më parë).

 3) Autorizimi për paraqitjen e dokumenteve:

 Dokumentet mund te paraqiten pranë Zyrave Postare njësoj,  si nga titullari ( i cili duhet të ketë me vete një dokument identiteti) ashtu dhe nga një person i tretë, i pajisur me autorizimin përkatës. Personi i tretë i autorizuar, duhet të ketë detyrimisht një fotokopje të dokumentit të identitetit të titullarit të dokumentit (tek i cili të jete e lexueshme mirë firma e të interesuarit) dhe një autorizim të nënshkruar nga ky i fundit ( KUJDES: firma tek autorizimi dhe ajo tek dokumenti i identitetit duhet të jenë identike, ne rast të kundërt autorizimi nuk do të pranohet).

 4) Çmimet  e shërbimit të përkthimeve/legalizimeve të dokumenteve:

 a) Përkthimi i certifikatave të gjendjes civile (certifikatë lindjeje, certifikatë personale, certifikatë e gjendjes familjare, certifikatë e trungut familjar, ekstrakt akti lindjeje, ekstrakt akti martese, certifikatë martese, certifikatë vdekjeje): 7 euro për certifikatë;

b) Përkthimi i dëshmive të penalitetit: 14 euro për dëshmi;

c) Legalizimi i të gjitha akteve të tjera te përkthyera: 17 euro për dokument

SHËNIMN: Qytetarët duhet të paguajnë pranë Zyrave Postare ekuivalenten në lekë të tarifës konsullore të sipërpërmendur (çmimi në lekë ndryshon çdo tremujor, në bazë të taksës së këmbimit të përcaktuar nga Ambasada Italiane në Tiranë).

OSMAN DEDJA